Et jit Minsche, die nämme sich furchbar wichtisch
Wenn die jätt verzälle, is nit ens de Hälfte rischtisch
Dann die, denne jeiht et immer furchtbar schlääch
Do merks de schnell, die sinn em Kopp och net janz ech
Et jitt esu vell Jecke bei uns he op der Welt
Doch du merks schnell, wenn dir einer jätt vum Pääd verzällt
Dä Tünn der kom jrundsätzlich e Stöndche zo spät
Doch loch et nieh an ihm selvs, immer leef jätt verkeeht
Öm kein Usreed es hä jemals zo verleje jewäss
Su maat hä rejelmäßig Tön, ävver miehtstens nur Dress
Et jitt esu vell Jecke bei uns he op der Welt
Doch du merks schnell, wenn dir einer jätt vum Pääd verzällt
Hür jot zo, lur jot hin, ävver loss dir nix verzälle
Lur jot hin, hür jot zo, loss se schwaade wat se welle
Et jitt immer einer, der vum Pääd verzällt
Huh – dat is der eine vum Pääd
Der Jupp dä hott noch nie all Stange em Kranz
Un es als Panz at immer widder us d‘r Reih jedanz
Do hätt sich och bes Hück nix drahn jedonn
Un häss du dann der Jupp ens nävven dir stonn
Dann es dat einer vun dä Jecke bei uns he op der Welt
Doch du merks schnell
Dat och d‘r Jupp dir jätt vum Pääd verzällt
Ich wor ens Kaffe drinke mit nem richtije Schuss
Su en Jranat, bei der mer wirklich nix verstecke muss
Nur wie die de Schnüss opmaat un zo verzälle ahnfing
Do han ich schnell jemerk, in wat fürn Richtung dat jing
Et jitt esu vell Jecke bei uns he op der Welt
Doch du merks schnell, wenn dir einer jätt vum Pääd verzällt
Hür jot zo! Lur jot hin, ävver loss dir nix verzälle …
Un neulich dann beim Doktor, kreet ich nohjelaat
Ich sullt ming Kilos reduziere, do hann ich zo em jesaat
Ich esse täglich nur drei Blädere vum Ketteschlotstruch
Un künnt mir sellvs nit verklöre, wie dat köm met dem Buch
Et jitt esu vell Jecke bei uns he op der Welt
Doch och dä Doc merk
Wenn ihm einer jätt vum Pääd verzällt
Irjendwann is et su wick, ding Zick is öm
Un su steihs du janz allein vür d‘r Himmelspootz eröm
Du freus dich op e Wölkche un Jesang em Engelschor
Doch dann merks du, dat dat jar nit et Himmelspöötzje wor
Ne Düvel laach dich ahn un du häs widder fesjestellt
Dat selvs em Himmel immer einer jätt vum Pääd verzällt
Hür jot zo! Lur jot hin, ävver loss dir nix verzälle …
